ខេត្តរតនគិរី÷ខណៈគោលនយោបាយ «ភូមិ-ឃុំ មានសុវត្ថិភាព» ត្រូវបានរាជរដ្ឋាភិបាលជំរុញយ៉ាងសកម្ម ប៉ុន្តែនៅភូមិបរញុក ឃុំសាមគ្គី ស្រុកអូរជុំ ខេត្តរតនគិរី បែរកំពុងក្លាយជាជម្រកដ៏សុខសាន្តនៃសៃវៀនជល់មាន់ អាប៉ោង នឹងយូគី ដែលជាល្បែងស៊ីសងខុសច្បាប់ទៅវិញ។

ប្រជាពលរដ្ឋរស់នៅក្នុងមូលដ្ឋានបានសម្តែងការខកចិត្ត និងរិះគន់ចំៗទៅលើអាជ្ញាធរមានសមត្ថកិច្ចស្រុកអូរជុំ ថាបានបណ្តែតបណ្តោយឱ្យទីតាំងជល់មាន់ អាប៉ោង នឹងយូគី ទ្រង់ទ្រាយធំដំណើរការយ៉ាងរលូន ដោយគ្មានការកោតក្រែងច្បាប់បន្តិចសោះឡើយ។

ប្រភពពីអ្នកស្រុកបានឱ្យដឹងថា ទីតាំងសៃវៀនជល់មាន់នៅក្នុងចម្ការកៅស៊ូជារបស់ម្ចាស់ឈ្មោះអូនតូចអូនធំ កំពុងតែបន្តបើកទ្វារទទួលក្រុមអ្នកញៀនល្បែងមកប្រមូលផ្តុំគ្នាភ្នាល់លុយយ៉ាងអ៊ូអរជារៀងរាល់ថ្ងៃ។ សកម្មភាពនេះ មិនត្រឹមតែបំផ្លាញសណ្តាប់ធ្នាប់សាធារណៈប៉ុណ្ណោះទេ ប៉ុន្តែថែមទាំងជាដើមហេតុបង្កឱ្យកើតមានបទល្មើសចោរកម្ម អំពើហិង្សាក្នុងគ្រួសារ និងបញ្ហាគ្រឿងញៀន ដែលកំពុងគំរាមកំហែងដល់សុវត្ថិភាពរស់នៅរបស់ប្រជាពលរដ្ឋយ៉ាងធ្ងន់ធ្ងរ។

ការអសកម្មរបស់សមត្ថកិច្ច ធ្វើអោយពលរដ្ឋដាក់ការសង្ស័យលើការបំពេញភារកិច្ចរបស់អាជ្ញាធរមូលដ្ឋាន ថាហេតុអ្វីបានជាទីតាំងសៃវៀនជលមាន់បើកចំហរយ៉ាងនេះ ប៉ុន្តែគ្មានការបង្រ្កាប ឬមិនពិនិត្យមើលទាល់តែសោះ។

ប្រភពបន្តទៀតថា ការកើនឡើងនៃវង់ល្បែងត្រូវបានគេមើលឃើញថា ដើរទន្ទឹមគ្នានឹងការកើនឡើងនៃករណីចោរកម្ម និងបទល្មើសគ្រឿងញៀនក្នុងភូមិបរញុក ស្រុកអូរជុំ។

ទោះយ៉ាងណាក៏ដោយ ប្រជាពលរដ្ឋបានទទូចស្នើរដល់លោកអធិការស្រុកអូរជុំ មេត្តាចាត់កម្លាំងជំនាញចុះស្រាវជ្រាវ និងបង្ក្រាបទីតាំងនេះឱ្យមានប្រសិទ្ធភាព ដោយមិនត្រូវ “ធ្វើមើលមិនឃើញ” នោះឡើយ។

មហាជន និងប្រជាពលរដ្ឋ កំពុងរង់ចាំមើលយ៉ាងយកចិត្តទុកដាក់ថា តើលោកអធិការស្រុកអូរជុំ  នឹងមានចំណាត់ការក្តៅយ៉ាងណា ចំពោះទីតាំងសៃវៀនជល់មាន់ អាប៉ោង នឹងយូគី មួយនេះ ដើម្បីស្តារទំនុកចិត្តរបស់ប្រជាពលរដ្ឋ និងរក្សាសន្តិសុខក្នុងមូលដ្ឋានឱ្យបានពិតប្រាកដ?៕
រូបភាពនិងអត្ថបទដោយលោកដួង វេហា