(ខេត្តកំពង់ធំ)៖ ដោយអនុវត្តតាមបទបញ្ជារបស់ឯកឧត្តមទេសរដ្ឋមន្ត្រី នាយឧត្តមសេនីយ៍ គន់ គីម អនុប្រធាននិងជាអគ្គលេខាធិការសមាគមអតីតយុទ្ធជនកម្ពុជា។
នៅព្រឹកថ្ងៃទី១៨ ខែមេសា ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង ប្រធានសមាគមអតីតយុទ្ធជនកម្ពុជាខេត្តកំពង់ធំ បានដឹកនាំសហការី ទៅពិនិត្យនិងជំរុញសកម្មភាពចាក់ដីបំពេញទីធ្លាសម្រាប់សាងសង់ទីស្នាក់ការមាគមអតីតយុទ្ធជនកម្ពុជាខេត្តកំពង់ធំ ដែលគ្រោងដំណើរការនៅពេលខាងមុខនេះ ក្រោមអធិបតីភាពឯកឧត្ដមនាយឧត្តមសេនីយ៍ គន់ គីម អនុប្រធាននិងជាអគ្គលេខាធិការសមាគមអតីតយុទ្ធជនកម្ពុជា ។
ឧត្តមសេនីយ៍ទោ សោម ស៊ុន បានបញ្ជាក់ថា នៅមុនពេលចូលឆ្នាំថ្មីប្រពៃណីជាតិខ្មែរកន្លងទៅនេះ ក្រុមការងារសមាគមអតីតយុទ្ធជនកម្ពុជាខេត្តកំពង់ធំ ដោយមានការឧបត្ថម្ភជ្រោមជ្រែងពីគណៈកម្មាធិការសមាគមអតីតយុទ្ធជនកម្ពុជា ក្រុមការងារសមាគមអតីតយុទ្ធជនជនកម្ពុជាខេត្តកំពង់ធំ បានទំនាក់ទំនងធ្វើការចាក់ដីបំពេញទីធ្លាបានទំហំ ១,៥០០ម៉ែត្រការ៉េ រួចមកហើយ ។ ថ្ងៃនេះតាមបទបញ្ជារបស់ឯកឧត្តមនាយឧត្តមសេនីយ៍ គន់ គីម ក្រុមការងារសមាគមអតីតយុទ្ធជនកម្ពុជាខេត្តកំពង់ធំ បានទំនាក់ទំនងនិងដំណើរការចាក់ដីបំពេញទីធ្លាបន្ថែមចំនួន៣,៥០០ ម៉ែត្រការ៉េទៀត ដើម្បីសម្រួលដល់ការរៀបចំពិធីបញ្ចុះបឋមសិលាសាងសង់ទីស្នាក់ការសមាគមអតីតយុទ្ធជនកម្ពុជានៅខេត្តកំពង់ធំ ឲ្យបានទាន់ពេលវេលាតាមការគ្រោងទុករបស់ឯកឧត្តមទេសរដ្ឋមន្ត្រីនាយឧត្តមសេនីយ៍ គន់ គីម នៅពេលដ៏ខ្លីខាងមុខនេះ ។
ឧត្តមសេនីយ៍ទោ សោម ស៊ុន បានបញ្ជាក់បន្ថែមទៀតថា ទីស្នាក់ការសមាគមអតីតយុទ្ធជនកម្ពុជា ខេត្តកំពង់ធំ ដែលត្រូវសាងសង់នៅពេលខាងមុខនេះ មានទំហំអគារ ជាង៣៥០ម៉ែត្រការ៉េ ដែលត្រូវសាងសង់នៅលើផ្ទៃដីទំហំ ជាង ៦៦០ ម៉ែត្រការ៉េ ដើម្បីបម្រើនិរន្តរភាពការងារសមាគមអតីតយុទ្ធជនកម្ពុជានៅខេត្តកំពង់ធំ និងដោះស្រាយការលំបាកផ្សេងៗ ក្នុងការបម្រើជូនបងប្អូនអតីតយុទ្ធជន ឱ្យមានភាពល្អប្រសើរនិងយូរអង្វែងតទៅ ស្របតាមអនុសាសន៍ណែនាំរបស់សម្ដេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជនកម្ពុជា។
